8TH TAMIL தொகைநிலை தொகாநிலைத் தொடர்கள்

8TH TAMIL தொகைநிலை தொகாநிலைத் தொடர்கள்

• ஒரு எழுத்து தனித்து நின்றோ, பல எழுத்துகள் தொடர்ந்து நின்றோ பொருள் தருவது = சொல்.
• சொற்கள் பல தொடர்ந்து நின்று பொருள் தருவது = சொற்றொடர் அல்லது தொடர்

தொகைநிலைத் தொடர் என்றால் என்ன

• இரு சொற்களுக்கு இடையில் வேற்றுமை உருபுகளோ, வினை, பண்பு முதலியவற்றின் உருபுகளோ தொக்கி (மறைந்து) வருமானால் அதனைத் தொகைநிலைத் தொடர் என்பர்.

JOIN OUR TELEGRAM CHANNEL – T.ME/TNPSC_WINNERS

தொகைநிலைத் தொடர் எத்தனை வகைப்படும்

• தொகைநிலைத் தொடர் ஆறு வகைப்படும். அவை,
  • வேற்றுமைத் தொகை
  • வினைத்தொகை
  • பண்புத்தொகை
  • உவமைத்தொகை
  • உம்மைத்தொகை
  • அன்மொழித்தொகை.

வேற்றுமைத் தொகை என்றால் என்ன

• இரு சொற்களுக்கு இடையில் வேற்றுமை உருபு மறைந்து வந்து பொருள் தந்தால் அதனை வேற்றுமைத்தொகை என்பர்.
• எ.கா:
  • திருக்குறள் படித்தாள்
• இத்தொடர் திருக்குறளைப் படித்தாள் என விரிந்து நின்று பொருள் தருகிறது. இரு சொற்களுக்கும் இடையில் ‘ஐ’ என்னும் இரண்டாம் வேற்றுமை உருபு மறைந்து வந்துள்ளது.
  • திருவாசகம் படித்தான் = (ஐ) இரண்டாம் வேற்றுமைத்தொகை
  • தலைவணங்கு = (ஆல்) மூன்றாம் வேற்றுமைத்தொகை
  • சிதம்பரம் சென்றான் = (கு) நான்காம் வேற்றுமைத்தொகை
  • மலைவீழ் அருவி = (இன்) ஐந்தாம் வேற்றுமைத்தொகை
  • கம்பர் பாடல் = (அது) ஆறாம் வேற்றுமைத்தொகை
  • மலைக்குகை = (கண்) ஏழாம் வேற்றுமைத்தொகை

உருபும் பயனும் உடன்தொக்க தொகை

• ஒரு தொடரில் வேற்றுமை உருபும் அதன் பொருளை விளக்கும் சொல்லும் (பயன்) மறைந்து வருவது உருபும் பயனும் உடன்தொக்கத் தொகை எனப்படும்.
• எ.கா:
  • பணப்பை
• இது பணத்தைக் கொண்ட பை என விரிந்து பொருள் தருகிறது. பணம், பை என்னும் இரு சொற்களுக்கு இடையில் ‘ஐ’ என்னும் வேற்றுமை உருபும் ‘கொண்ட’ என்னும் சொல்லும் (உருபின் பயன்) மறைந்து வந்துள்ளன.
  • பால் குடம் = (பாலைக் கொண்ட குடம்)
    • இரண்டாம் வேற்றுமை உருபும் பயனும் உடன்தொக்க தொகை
  • பொற்சிலை = (பொன்னால் ஆகிய சிலை)
    • மூன்றாம் வேற்றுமை உருபும் பயனும் உடன்தொக்க தொகை
  • மாட்டுக் கொட்டகை = (மாட்டுக்குக் கட்டப்பட்ட கொட்டகை)
    • நான்காம் வேற்றுமை உருபும் பயனும் உடன்தொக்க தொகை

வினைத்தொகை என்றால் என்ன

• காலம் காட்டும் இடைநிலையும், பெயரெச்ச விகுதியும் மறைந்து வரும் பெயரெச்சத்தை வினைத்தொகை என்பர்.

காலம் கரந்த பெயரெச்சம் வினைத்தொகை – ( நன்னூல் 364)

• எ.கா:
  • ஆடுகொடி, வளர்தமிழ்
• இத்தொடர்களில் ஆடு, வளர் என்பவை வினைப்பகுதிகள்.
• இவை முறையே கொடி, தமிழ் என்னும் பெயர்ச்சொற்களோடு சேர்ந்து காலம் காட்டாத பெயரெச்சங்களாக உள்ளன.
• அதாவது காலம் காட்டும் இடைநிலைகள் தொக்கி உள்ளன.
• மேலும் இவை முறையே ஆடிய கொடி, ஆடுகின்ற கொடி, ஆடும் கொடி எனவும் வளர்ந்த தமிழ், வளர்கின்ற தமிழ், வளரும் தமிழ் எனவும் முக்காலத்திற்கும் பொருந்தும்படி பொருள் தருகின்றன.

பண்புத்தொகை என்றால் என்ன

• பண்புப் பெயருக்கும் அது தழுவி நிற்கும் பெயர்ச்சொல்லுக்கும் இடையே ஆன, ஆகிய என்னும் பண்புருபுகள் மறைந்து வருவது பண்புத்தொகை எனப்படும்.
• எ.கா:
  • வெண்ணிலவு, கருங்குவளை
• இத்தொடர்களில் வெண்மை, கருமை என்னும் பண்புகள் நிலவு, குவளை என்னும் பெயர்ச்சொற்களைத் தழுவி நிற்கின்றன.
• ஆன, ஆகிய என்னும் பண்புருபுகள் மறைந்து வெண்மையான நிலவு, கருமையாகிய குவளை என்னும் பொருள்களைத் தருகின்றன.

இருபெயரொட்டுப் பண்புத்தொகை என்றால் என்ன

• சிறப்புப்பெயர் முன்னும் பொதுப்பெயர் பின்னும் நிற்க, இடையில் ஆகிய என்னும் பண்புருபு மறைந்து வருவதை இருபெயரொட்டுப் பண்புத்தொகை என்பர்.
• எ.கா:
  • பனைமரம்
• இத்தொடர் பனையாகிய மரம் என விரியும்.
• மரம் என்பது பொதுப்பெயர்.
• பனை என்பது மரங்களுள் ஒன்றனைக் குறிக்கும் சிறப்புப்பெயர்.

உவமைத்தொகை என்றால் என்ன

• உவமைக்கும் உவமேயத்துக்கும் இடையில் போல, போன்ற, நிகர, அன்ன முதலிய உவம உருபுகளுள் ஒன்று மறைந்து வருவது உவமைத்தொகை எனப்படும்.
• எ.கா;
  • மலர்விழி
• இத்தொடர் மலர் போன்ற விழி என்ற பொருள் தருகிறது.
• மலர் – உவமை
• விழி – உவமேயம்
• இடையில் போன்ற என்னும் உவம உருபு மறைந்து வந்துள்ளது.

உம்மைத்தொகை என்றால் என்ன

• சொற்களுக்கு இடையிலும், இறுதியிலும் உம் என்னும் இடைச்சொல் மறைந்து நின்று பொருள் தருவதை உம்மைத்தொகை என்பர்.
• எ.கா;
  • இரவுபகல், தாய்தந்தை
• இத்தொடர்கள் இரவும் பகலும் தாயும் தந்தையும் என விரிந்து பொருள் தருகின்றன.
• இதில் சொற்களின் இடையிலும், இறுதியிலும் உம் என்னும் இடைச்சொல் மறைந்து நின்று பொருள் தருகிறது.

எண்ணும்மை என்றால் என்ன

• ஒன்றுக்கு மேற்பட்ட சொற்களில் உம் என்னும் உருபு வெளிப்பட வருவது எண்ணும்மை எனப்படும்.
• “உம்” என்னும் உருபு வெளிப்படையாக (மறையாமல்) வருவது எண்ணும்மை ஆகும்.
• எ.கா:
  • இரவும் பகலும், பசுவும் கன்றும்

அன்மொழித்தொகை என்றால் என்ன

• அல் + மொழி + தொகை = அன்மொழித்தொகை.
• வேற்றுமை, வினை, பண்பு, உவமை, உம்மை ஆகிய தொகைநிலைத் தொடர்களுள், அவை அல்லாத வேறு பிற சொற்களும் மறைந்து வருவது அன்மொழித்தொகை (அல் + மொழி + தொகை) எனப்படும்.
• எ.கா:
  • பொற்றொடி வந்தாள். (தொடி – வளையல்)
  • தொடி என்பதன் பொருள் = வளையல்
• இத்தொடரில் பொற்றொடி என்பது பொன்னாலான வளையல் எனப் பொருள் தரும்.
• இத்தொடர் வந்தாள் என்னும் வினைச்சொல்லைத் தழுவி நிற்பதால் பொன்னாலாகிய வளையலை அணிந்த பெண் வந்தாள் என்னும் பொருள் தருகிறது.
• இதில் ‘ஆல்’ என்னும் மூன்றாம் வேற்றுமை உருபும் ‘ஆகிய’ என்னும் அதன் பயனும் மறைந்து வந்து, வந்தாள் என்னும் சொல்லால் பெண் என்பதையும் குறிப்பதால் இது மூன்றாம் வேற்றுமைப் புறத்துப் பிறந்த அன்மொழித்தொகை எனப்படும்.

தொகாநிலைத்தொடர் என்றால் என்ன

• ஒரு தொடரில் இரு சொற்கள் வந்து அவற்றின் இடையில் எச்சொல்லும் எவ்வுருபும் மறையாமல் (வெளிப்படையாக) நின்று பொருள் உணர்த்தினால் அதனைத் தொகாநிலைத் தொடர் என்பர்.

தொகாநிலைத்தொடர் எத்தனை வகைப்படும்

• தொகாநிலைத் தொடர் ஒன்பது வகைப்படும். அவை,
  • எழுவாய்த் தொடர்
  • விளித்தொடர்
  • வினைமுற்றுத் தொடர்
  • பெயரெச்சத் தொடர்
  • வினையெச்சத் தொடர்
  • வேற்றுமைத் தொகாநிலைத் தொடர்
  • இடைச்சொல் தொடர்
  • உரிச்சொல் தொடர்
  • அடுக்குத்தொடர்

எழுவாய்த் தொடர் என்றால் என்ன

• எழுவாய் மற்றும் பயனிலை இடையே எச்சொல்லும் மறையாமல் வருவது எழுவாய்த் தொடர் எனப்படும்.
• எ.கா;
  • மல்லிகை மலர்ந்தது.
• இதில் ‘மல்லிகை’ என்னும் எழுவாயைத் தொடர்ந்து ‘மலர்ந்தது’ என்னும் பயனிலை அமைந்து, இடையில் எச்சொல்லும் மறையாமல் வந்துள்ளது.

விளித்தொடர் என்றால் என்ன

• நண்பா படி
• இதில் ‘நண்பா’ என்னும் விளிப்பெயர் ‘படி’ என்னும் பயனிலையைக் கொண்டு முடிந்து, இடையில் எச்சொல்லும் மறையாமல் வந்துள்ளதால் இது விளித்தொடர் ஆகும்.

வினைமுற்றுத் தொடர் என்றால் என்ன

• சென்றனர் வீரர்.
• இதில் ‘சென்றனர்’ என்னும் வினைமுற்று ‘வீரர்’ என்னும் பெயரைக் கொண்டு முடிந்து, இடையில் எச்சொல்லும் மறையாமல் வந்துள்ளதால் இது வினைமுற்றுத் தொடர் ஆகும்.

பெயரெச்சத்தொடர் என்றால் என்ன

• வரைந்த ஓவியம்.
• இதில் ‘வரைந்த’ என்னும் எச்சவினை ‘ஓவியம்’ என்னும் பெயர்ச்சொல் கொண்டு முடிந்து, இடையில் எச்சொல்லும் மறையாமல் வந்துள்ளதால் இது பெயரெச்சத் தொடர் ஆகும்.

வினையெச்சத் தொடர் என்றால் என்ன

• தேடிப் பார்த்தான்.
• இதில் ‘தேடி’ என்னும் வினையெச்சச் சொல் ‘பார்த்தான்’ என்னும் வினைமுற்றுச்சொல் கொண்டு முடிந்து, இடையில் எச்சொல்லும் மறையாமல் வந்துள்ளதால் இது வினையெச்சத் தொடர் ஆகும்.

வேற்றுமைத் தொகாநிலைத் தொடர் என்றால் என்ன

• கவிதையை எழுதினார்.
• இதில் ‘ஐ’ என்னும் வேற்றுமை உருபு வெளிப்படையாக வந்து பொருளை உணர்த்துவதால் இது வேற்றுமைத் தொகாநிலைத் தொடர் ஆகும்.

இடைச்சொல் தொடர் என்றால் என்ன

• மற்றுப் பிற (மற்று + பிற)
• இதில் ‘மற்று’ என்னும் இடைச்சொல் வெளிப்படையாக வந்துள்ளதால் இஃது இடைச்சொல் தொடர் ஆகும்.

உரிச்சொல் தொடர் என்றால் என்ன

• சாலவும் நன்று.
• இதில் ‘சால’ என்னும் உரிச்சொல் வெளிப்படையாக வந்துள்ளதால் இஃது உரிச்சொல் தொடர் ஆகும்.

அடுக்குத்தொடர் என்றால் என்ன

• நன்று நன்று நன்று
• இதில் ஒரே சொல் பலமுறை அடுக்கி வந்துள்ளதால் இஃது அடுக்குத்தொடர் ஆகும்.

 

• தமிழ் வரிவடிவ வளர்ச்சி
• சொற்பூங்கா
• எழுத்துகளின் பிறப்பு
• ஓடை
• கோணக்காத்துப் பாட்டு
• நிலம் பொது
• வெட்டுக்கிளியும் சருகுமானும்
• வினைமுற்று
• தொடர் வகைகள்
• திருக்குறள்
• நோயும் மருந்தும்
• வருமுன் காப்போம்
• தமிழர் மருத்துவம்
• தலைக்குள் ஒர் உலகம்
• எச்சம்
• கல்வி அழகே அழகு
• புத்தியைத் தீட்டு
• பல்துறைக் கல்வி